ក្នុងនាមជាផ្នែកមួយនៃភាពជាដៃគូរយៈពេលវែងជាមួយក្លឹបបាល់ទាត់ Tottenham Hotspur ក្នុងការលើកកម្ពស់សុខភាព និងសុខុមាលភាពនៅទូទាំងតំបន់អាស៊ីប៉ាស៊ីហ្វិក ក្លឹបបាល់ទាត់នេះនឹងដាក់និមិត្តសញ្ញាអង្គការផ្កាយសមុទ្រជំនួសឲ្យនិមិត្តសញ្ញារបស់ក្រុមហ៊ុនធានារ៉ាប់រងអាយុជីវិត អេ អាយ អេ នៅផ្នែកខាងមុខនៃអាវរបស់ក្រុម ហើយនឹងនៅលើផ្លាកដាក់ជុំវិញទីលានប្រកួតដើម្បីផ្សព្វផ្សាយលើកកម្ពស់ការយល់ដឹង ។
អាវកីឡាដែលត្រូវបានពាក់ក្នុងការប្រកួតនឹងត្រូវចុះហត្ថលេខាដោយកីឡាករ និងដាក់ដេញថ្លៃដើម្បីរៃអង្កាសថវិកាឲ្យអង្គការផ្កាយសមុទ្រ និងមូលនិធិរបស់ក្លឹបបាល់ទាត់ Tottenham Hotspur ដែលមានគោលដៅបង្កើតឳកាសនាំមកនូវការផ្លាស់ប្តូរក្នុងជីវិតដល់ប្រជាជនក្នុងសហគមន៍មូលដ្ឋាន ។
អង្គការផ្កាយសមុទ្រប្រើប្រាស់ការអប់រំដើម្បីផ្លាស់ប្រែជីវិតរបស់កុមារក្រីក្ររាប់ពាន់នាក់នៅកម្ពុជា ដែលជាប្រទេសមួយមានកុមារជិត ៤៩% កំពុងរស់នៅក្នុងភាពក្រីក្រពហុសមាសភាគ ។ គំនិតផ្តួចផ្តើមអប់រំរបស់អង្គការមួយនេះបានផ្លាស់ប្តូរជីវិតសិស្សានុសិស្សរាប់រយនាក់ក្នុងមួយឆ្នាំ ដែលពួកគេធ្លាប់បោះបង់ការសិក្សា រឺមិនធ្លាប់បានចូលរៀនសូត្រពីមុនមកទេ ។ សិស្សទាំងនេះទទួលបានឳកាសក្នុងការចូលរៀនថ្នាក់អប់រំពន្លឿន និងការគាំទ្រដ៏សំខាន់ផ្សេងទៀតដូចជាការថែទាំសុខភាព អាហារូបត្ថម្ភ និងការអភិវឌ្ឍន៍ការងារ ។
ជាមួយគ្នានេះផងដែរ កីឡាក៏ដើរតួនាទីយ៉ាងសំខាន់លើផលប៉ះពាល់វិជ្ជមានដែលអង្គការផ្កាយសមុទ្របានផ្តល់ដល់តំបន់ក្រីក្រមួយចំនួនក្នុងប្រទេសកម្ពុជា ។ កម្មវិធីបាល់ទាត់ដែលទទួលបានពានរង្វាន់របស់អង្គការមួយនេះធ្វើការជាមួយកុមាររាប់ពាន់នាក់ ដែលមានសមត្ថភាពចម្រុះ និងក៏ជាអង្គការដំបូងគេមួយក្នុងចំនោមអង្គការដទៃនៅកម្ពុជា ដែលផ្តល់ឱកាសដល់កីឡាករពិការ និងផ្ទុកមេរោគអេដស៍ទៀតផង ។
ក្រុមហ៊ុនធានារ៉ាប់រងអាយុជីវិត អេ អាយ អេ ខេមបូឌា បានសហការជាមួយនឹងអង្គការផ្កាយសមុទ្រអស់រយៈពេលជាច្រើនឆ្នាំមកហើយ ហើយគ្រូបង្វឹកសម្រាប់ការអភិវឌ្ឍន៍បាល់ទាត់ពិភពលោករបស់ក្លឹប Tottenham Hotspur ក៏បានចំណាយពេលនៅទីក្រុងភ្នំពេញធ្វើការជាមួយកីឡាករ និងគ្រូបង្វឹកស្ម័គ្រចិត្តជាច្រើនដើម្បីគាំទ្រដល់គំនិតផ្តួចផ្តើមបាល់ទាត់ថ្នាក់មូលដ្ឋានរបស់អង្គការផ្កាយសមុទ្រផងដែរ ។
នៅដើមសប្តាហ៍ថ្មីៗនេះ គ្រូបង្វឹករបស់យើងបានរៀបចំវគ្គបណ្តុះបណ្តាលប្រឹក្សាយោបល់មួយតាមអ៊ីនធើណេតសម្រាប់អ្នកស្ម័គ្រធ្វើការក្នុងគម្រោង ហើយអ្នកចូលរួមមួយចំនួនក៏នឹងបានធ្វើជាអ្នកអមដំណើរកីឡាករចូលទីលានពីចម្ងាយផងដែរ សម្រាប់ការប្រកួតនៅថ្ងៃអាទិត្យនេះ ។
អ្នកស្រី Donna-Maria Cullen នាយកប្រតិបត្តិរបស់ក្លឹបបាល់ទាត់ Tottenham Hotspur បានមានប្រសាសន៍ថា “ពួកយើងបានឃើញពីផលវិជ្ជមានជាក់ស្តែងនៃការងាររបស់អង្គការផ្កាយសមុទ្រនៅទីក្រុងភ្នំពេញ ហើយនឹងមានក្តីរំភើបរីករាយ ដែលបានគាំទ្រនូវបុព្វហេតុដ៏មានតម្លៃមួយនេះដើម្បីជួយផ្សព្វផ្សាយ និងរៃអង្កាសថវិកាឲ្យអង្គការនេះជាមួយនឹងដៃគូរបស់យើងគឺ ក្រុមហ៊ុន អេ អាយ អេ ។
“ក្នុងនាមជាក្លឹបបាល់ទាត់ ជាមួយនឹងវេទិកាពិភពលោកជាក់លាក់មួយ ពួកយើងមានបទពិសោធន៍ទូលំទូលាយក្នុងការប្រើប្រាស់ថាមពលកីឡាដើម្បីបង្កើតឱកាសដែលនាំឲ្យមានការផ្លាស់ប្តូរក្នុងជីវិតទាំងក្នុង និងក្រៅប្រទេស ។
“អង្គការផ្កាយសមុទ្រគឺជាបុព្វហេតុមួយក្នុងចំនោមបុព្វហេតុជាច្រើនដែលយើងបានផ្តល់ការគាំទ្រជាមួយនឹងក្រុមហ៊ុន អេ អាយ អេ ខណៈដែលពួកយើងកំពុងបន្តធ្វើការជាមួយគ្នាដើម្បីលើកកម្ពស់សុខភាព និងសុខុមាលភាពនៅទូទាំងតំបន់ប៉ាស៊ីហ្វិក ជាទីកន្លែងដែលអ្នកគាំទ្រជាច្រើនរបស់យើងកំពុងរស់នៅ ។”
លោក Stuart A. Spencer ជានាយកផ្នែកទីផ្សាររបស់ក្រុមហ៊ុន អេ អាយ អេ បានឲ្យដឹងថា “ការអប់រំមានថាមពលក្នុងការផ្លាស់ប្រែជីវិតរបស់យុវជន ហើយដូច្នេះហើយបានជាក្រុមហ៊ុនធានារ៉ាប់រងអាយុជីវិត អេអាយអេមានមោទនភាពយ៉ាងខ្លាំងក្នុងការសហការជាមួយអង្គការផ្កាយសមុទ្រតាំងពីឆ្នាំ២០១៧ ដោយមានគោលបំណងស្របជាមួយយើងក្នុងការជួយប្រជាជនរាប់លាននាក់ទូទាំងអាស៊ីឲ្យមានសុខភាព និងជីវិតកាន់តែប្រសើរ ។
“អង្គការផ្កាយសមុទ្រផ្តល់ការអប់រំដល់កុមារដែលបាត់បង់ឳកាស ហើយអង្គការនេះប្រើប្រាស់កីឡាបាល់ទាត់ដើម្បីជម្រុញឲ្យមានមិត្តភាព និងភាពសប្បាយរីករាយសម្រាប់កុមារក្រីក្រនៅកម្ពុជា ។
“ពួកយើងមានក្តីសោមនស្សដែលបាននាំយកអង្គការផ្កាយសមុទ្រទៅលើឆាកអន្តរជាតិ តាមរយៈភាពជាដៃគូរបស់យើងជាមួយនឹងក្លឹបបាល់ទាត់ Tottenham Hotspur ហើយពួកយើងសង្ឃឹមថាទស្សនិកជនបាល់ទាត់នឹងចាប់ផ្តើមស្គាល់អង្គការផ្កាយសមុទ្រ និងគាំទ្រដល់អង្គការមួយនេះកាន់តែច្រើនឡើងនៅពេលអនាគត ។ ”
លោកស្រី Pauline Teoh អគ្គនាយិកាក្រុមហ៊ុន អេ អាយ អេ ខេមបូឌា បានមានប្រសាសន៍ថា៖ “ យើងមានកិត្តិយសណាស់ដែលបានចូលរួមជាផ្នែកមួយនៃគំនិតផ្តួចផ្តើមនេះ និងបន្តភាពជាដៃគូដ៏យូរអង្វែងជាមួយក្លឹបបាល់ទាត់ Tottenham Hotspur និង អង្គការផ្កាយសមុទ្រកម្ពុជា(ISF) ជាពិសេសការជួយដល់កុមារក្រីក្រនៅកម្ពុជា។
ថវិកាសប្បុរសធម៌ដែលប្រមូលបាន មិនត្រឹមតែជួយដល់កុមារកម្ពុជាទាំងនោះប៉ុណ្ណោះទេ ប៉ុន្តែក៏ចូលរួមជាចំណែកមួយដោយប្រយោលផងដែរ ក្នុងការជួយផ្សព្វផ្សាយកាន់តែទូលំទូលាយដល់ប្រជាជនកម្ពុជា ថាយើងអាចរួបរួមគ្នាធ្វើអ្វីៗបានជាច្រើន ដើម្បីជួយឲ្យសុខុមាលភាពរបស់កុមារក្រីក្រនៅក្នុងប្រទេសកាន់តែប្រសើរ។ ”
កញ្ញា ជួប វិច្ឆិកា ប្រធានប្រចាំប្រទេសរបស់អង្គការផ្កាយសមុទ្របានបន្ថែមថា “ពួកយើងសូមថ្លែងអំណរគុណយ៉ាងជ្រាលជ្រៅចំពោះការគាំទ្រដ៏មានតម្លៃមួយនេះតាមរយៈភាពជាដៃគូរបស់យើងជាមួយនឹងក្លឹបបាល់ទាត់ Tottenham Hotspurs និងក្រុមហ៊ុន អេ អាយ អេ ខេមបូឌា ។ ការដាក់បង្ហាញនិមិត្តសញ្ញារបស់អង្គការផ្កាយសមុទ្រលើអាវកីឡាកំឡុងពេលការប្រកួត EPL គឺកិត្តិយសដ៏ធំធេងមួយសម្រាប់អង្គការរបស់យើង កុមារ និងប្រជាជនកម្ពុជាទាំងអស់ផងដែរ ។ វាមិនត្រឹមតែបង្ហាញពីការទទួលស្គាល់អំពីការងាររបស់យើងប៉ុណ្ណោះទេ ប៉ុន្តែវាក៏ជាការជម្រុញទឹកចិត្តយ៉ាងខ្លាំងមួយដើម្បីឲ្យយើងបន្តគាំទ្រដល់កុមារក្រីក្ររាប់ពាន់នាក់នៅកម្ពុជា ដោយបង្កើតឲ្យមានការផ្លាស់ប្តូរចាប់ពីកុមារម្នាក់ទៅ ។
ពួកយើងសូមថ្លែងអំណរគុណយ៉ាងធំធេងចំពោះអ្នកគ្រប់គ្នានៅក្លឹបបាល់ទាត់ Tottenham Hotspur និងក្រុមហ៊ុន អេអាយ អេ ដែលបានធ្វើឲ្យកម្មវិធីនេះអាចដំណើរទៅបាន ។ ពួកយើងនឹងទស្សនាការប្រកួតនេះពីប្រទេសកម្ពុជា និងចូលរួមលើកទឹកចិត្តដល់ក្រុមផងដែរ!”
ក្លឹបបាល់ទាត់ Tottenham Hotspur មានគ្រូបង្វឹកសម្រាប់ការអភិវឌ្ឍន៍បាល់ទាត់ពិភពលោកចំនួនបួននាក់ ដែលកំពុងរស់នៅអាស៊ីដើម្បីជួយគាំទ្រដល់គោលដៅរបស់ក្រុមហ៊ុន អេអាយអេ ដោយផ្តល់ឳកាសលេងបាល់ទាត់
ដល់កីឡាករ និងគ្រូបង្វឹកជាង ៦៥,០០០នាក់ចាប់តាំងពីឆ្នាំ២០១៧មក ។ ក្រុមហ៊ុនធានារ៉ាប់រងអាយុជីវិត អេអាយអេក៏បានប្រើប្រាស់កីឡាករក្នុងក្រុមនាំមុខរបស់ក្លឹប និងបុគ្គលិកគាំទ្រឯទៀតក្នុងកម្មវិធីពិសេសផ្សេងៗ ដើម្បីលើកទឹកចិត្តដល់អតិថិជន ភ្នាក់ងារ និងបុគ្គលិករបស់ខ្លួនឲ្យមានជីវិតល្អប្រសើរប្រកបដោយសុខភាព និងភាពយូរអង្វែង ។
វាគឺជាលើកទីបីហើយដែលក្លឹបបាល់ទាត់ Tottenham Hotspur ពាក់អាវដែលបោះពុម្ពជាពិសេសសម្រាប់គាំទ្រដល់ភាពជាដៃគូមូលនិធិអន្តរជាតិរបស់ក្រុមហ៊ុន អេអាយអេ ដោយបានផ្តល់ការគាំទ្រដល់កម្មវិធីអភិវឌ្ឍបាល់ទាត់យុវជនរបស់ក្រុមហ៊ុន អេអាយអេ នៅប្រទេសចិននៅឆ្នាំ២០១៥ និងកម្មវិធី ‘ចែករំលែកជីវិត’ នៅឆ្នាំ២០១៦ របស់ក្រុមហ៊ុន អេអាយអេ នៅប្រទេសថៃ ។
